Ақсу ферроқорытпа зауыты құны 1,1 млрд теңгеге автотрансформатор сатып алды
Энергиямен сенімді қамтамасыз ету үшін ERG құрамындағы «Қазхром» ТҰК» АҚ филиалы – Ақсу ферроқорытпа зауыты энергетикалық инфрақұрылымын жаңғыртып жатыр деп хабарлайды irbistv.kz. Кәсіпорын қуаты 250 МВА болатын жаңа күштік автотрансформатор сатып алды. Жобаға салынған инвестиция көлемі 1,1 млрд теңгеден асты.
Ферроқорытпа өндірісінде электр энергиясы – шешуші ресурстардың бірі. Зауытта өнім жоғары температурада жұмыс істейтін қуатты электр пештерінде балқытылады. Сондықтан кәсіпорын электр энергиясын көп қажет ететін өндіріс орындарының қатарына жатады. Ал қуаттың тұрақты әрі үздіксіз берілуі технологиялық процестердің қауіпсіздігі мен тұрақтылығына тікелей әсер етеді.
Осыған байланысты жаңа автотрансформаторды орнату – жай ғана ескірген жабдықты ауыстыру емес. Бұл зауыттың энергетикалық жүйесін күшейтіп, оның сенімділігін арттыруға және қосымша қуат резервін қалыптастыруға бағытталған маңызды қадам.
«Энергетиктер үшін ең үздік нәтиже – жабдықтардың тұрақты жұмыс істеуі, жөндеу жұмыстарының уақытылы жүргізілуі және төтенше жағдайларға арналған сенімді қуат қорының болуы. Негізгі трансформаторлар – зауыттың "жүрегі". Жаңа жабдық іске қосылғаннан кейін энергетикалық жүйенің мүмкіндігі артты. Енді қолданыстағы жүктемені толық қамтамасыз етіп қана қоймай, алдағы жылдары құрылғыларды жоспарлы түрде жаңартуға жеткілікті резерв бар», – деді Ақсу ферроқорытпа зауытының бас энергетигі Мансур Газин.
Заманауи технологиялар және қауіпсіздік
Жаңа автотрансформатор заманауи онлайн-мониторинг және өзін-өзі диагностикалау жүйелерімен жабдықталған. Бұл жабдықтың жұмысын тұрақты бақылап, ақауларды ерте анықтауға мүмкіндік береді. Сонымен қатар құрылғы автоматты өрт сөндіру жүйесімен қамтамасыз етілген.
Жаңа агрегат зауыттың негізгі төмендеткіш қосалқы станцияларының бірінде іске қосылды. Ал 40 жылдан астам уақыт бойы пайдаланылған бұрынғы қондырғы күрделі жөндеуге жіберілді.
Жөндеу жұмыстары аяқталғаннан кейін қосалқы станциядағы екінші агрегат та жаңғыртудан өтеді. Осылайша кәсіпорын энергетикалық инфрақұрылымды біртіндеп жаңартып, өндірістің негізгі жабдықтарының сенімділігін арттыруды көздеп отыр.
Энергетикалық тұрақтылық – өндірістің негізі
Ферроқорытпа өндірісі үшін электр энергиясының тұрақты берілуі өнім сапасы мен өндіріс қарқынына ғана емес, кәсіпорынның жалпы қауіпсіздігіне де әсер етеді. Сондықтан энергетикалық инфрақұрылымға салынған инвестициялар өндірістің бүгінгі қажеттілігін өтеумен қатар, оның болашақтағы тұрақты жұмысына негіз қалайды.
Ақсу ферроқорытпа зауытындағы жаңа трансформатордың іске қосылуы – кәсіпорынның технологиялық жабдықтарды кезең-кезеңімен жаңарту және өндірістік қуаттың сенімділігін арттыру бағытындағы жұмысының бір бөлігі.
_165x102_fc8.jpg)
_200x0_fbe.jpg)
