Биыл түлектер кешін тойлауда бірқатар қатаң шектеулер енгізілді
Елімізде эпидемиологиялық жағдай жақсарғанымен биыл түлектер кеші дүркіретіп тойланбайды. Салтанатты шараны бірқатар шектеулермен тек мектеп қабырғасында немесе аумағында өткізуге болады. Шара 16-17 маусымға жоспарланған.
-Түлектер кешіне аниматорларды, мерекелік агенттіктерді, жеке студияларды шақыруға, мерекелік дастархан ұйымдастыруға, қала ішінде автокөлікті жалға алып экскурсия жүргізуге, әкімшілікке және педагогтерге сыйлыққа ақша жинауға тыйым салынады,- дейді Павлодар облысының білім саласында сапаны қамтамасыз ету департаментінің басшысы Ляззат Жакиянова.
Аталған бұзушылықтар анықталған жағдайда мекеме басшысына 20-дан 120 айлық есептік көрсеткішке дейін айыппұл қарастырылған. Бұдан бөлек брифинг барысында педагог мәртебесі де сөз болды. Оқу жылында оның аясында 2 факт бойынша тексеріс жүргізілген.
-Екібастұз қаласындағы мектептердің бірінің директорына мұғалімдерді жөндеу жұмыстарына тартқаны үшін әкімшілік жаза берілді. Яғни жөндеу жұмыстары кезінде олар парталарды тасыды деген шағым түскен,- Павлодар облысының білім саласында сапаны қамтамасыз ету департаментінің басшысы Ляззат Жакиянова.
Екінші тексеріс АӘД пәнінің мұғалімі оқушыны ұрды деген шағым бойынша жүргізілген. Қос жағдайда да жауаптылар сөгіс алды.
Авторы:Арнагүл Исабекова
