Павлодарда Назарбаев даңғылындағы сәнді арканы қалпына келтіру жұмыстары басталды
Назарбаев даңғылы мен Естай көшелерінің қиылысындағы бұл арка бірнеше жыл бойы жұмыс істемей тұрған. Бастапқыда қызғылт түсті шамдармен безендірілген сәндік құралын биыл қалпына келтіреді. Қаланы көркем жарықтандыру аясында коммуналшылардың мердігерлік ұйымының жұмыстары жалғасуда. Нысанның эскиздік жобасы бойынша ол толықтай өзгеріске ұшырайды.
- Нысанның жаңа дизайн-жобасы әзірленді. Барлық техникалық шарттар дайын. Иллюминациялы шамдар жаңа металл құрылымға орнатылады. Мердігерлік ұйым ескісін демонтаждап, берік құрылым қоюда, - деді Павлодар қаласы әкімі баспасөз қызметінің басшысы Салтанат Әкімбекова.
Сәндік нысанның кабельдері, бақылау құралдары және тағы да басқа жабдықтары жаңадан орнатылады. Шамамен 28 мың жарықдиодты шамдар пайда болады. Арка желтоқсан айының ортасында қолданысқа беріледі.
Авторы: Айтмұхамбет Айғожа
