Павлодарды қардан тазарту үшін 150 арнайы техника жұмылдырылған
Қажет болған жағдайда адамдар мен көліктердің санын арттыру мүмкіндігі бардеп хабарлайды irbistv.kz тілшісі қала әкімдігіне сілтеме жасап.
Дәстүр бойынша қараша айының басында аймағымызда қар жауды. Сол себепті көлік жолдарын және жаяужолдарды тазартуға коммуналшылардың арнайы техникасы шықты.
-Таң атқаннан тракторлар жүріп жатқанын үйімнің бесінші қабатынан көремін. Жұмыстары көрінуде,-деп жеткізді қала тұрғыны.
-Қар көп жиналғанда, аулаларды дұрыс тазаламайды. Өткен жылы көршілерімізбен бірігіп қарды шығардық,-деп шағымын жеткізді өзге павлодарлық тұрғын.
Сонымен қатар, сары жейделі жұмыскерлер саябақтар мен орамішілік аумақтарды ақ ұлпадан тазалауда. Биыл Павлодарда бұл жұмыстармен екі мердігерлік ұйым айналысатын болады.
-Барлық техника біркелкі қаланың 8 шағын ауданында жұмыс істейді. Ең алдымен көктайғаққа қарсы материал шашылып, кейін сыпыру көліктері тазалайды. Қазіргі уақытта 1 мың текше метр қар полигонға шығарылды,- деді Павлодар қаласы әкімі баспасөз қызметінің басшысы Айнұр Садвакасова.
Бұл бағыттағы жұмыстар екі аусымда жүзеге асырылады. Көктайғаққа қарсы коммуналшылар 28 мың тонна арнайы материал дайындап үлгерді. Қардан тазалау шарасы жалғасуда.
