Екібастұзда полицейлер түтіндеп жатқан пәтерден балаларды құтқарды
Қуынышқа орай жеткіншектер аман, зардап шеккендер жоқ дейді irbistv.kz тілшісі
Түнгі сағат 01:00 шамасында Абай көшесіндегі тұрғын үйдегі пәтерден түтін шығып, 2-қабаттан балалар көмек сұрады. Бұл уақытта қалада патрульдеу жүргізген инспектор Алмаз Нұрмағамбетов, Темірлан Шадыров, Мейірман Еркін және ювеналды полиция қызметкері Арайлым Мұхамеджанова көмекке аттанады.
-Дереу екінші қабатқа көтерілдік, бірақ есіктер ішінен жабылған еді. Біз балалармен сырттан сөйлесіп, есіктерді ашқыздық. Кіре сала жас балаларды көтеріп алып, пәтерден шығара бастадық. Бөлмеде мас күйінде ұйықтап жатқан ата-аналар болған. Оятып, оларды да сыртқа шығардық. Жедел жәрдем келген соң балалар да, ересектерді де тексерді. Жеткіншектер ауруханаға жатқызылды. Біз тек өз міндетімізді орындадық. Мұндай жағдайда әр минут маңызды. Ата-аналары бізге алғыс айтты, бірақ біз үшін ең бастысы, бұл жағдайда барлығының аман қалғаны, - деді Екібастұз қаласы ПБ патрульдік полиция инспекторы Алмаз Нұрмағамбетов.
Отбасының жалдамалы пәтерде шамамен бір ай тұратындығы анықталды. Бір, үш, бес жас және ең кішкентай 9 айлық бала болған.
-Кәмелетке толмаған балалардың анасы кешкі асты жылытқысы келіп, кастрюльді электр пешіне қойып, өзі төсекке жатып қалған. Ата-аналар пәтерде не болғанын білмеген. Медициналық куәландырудан кейін заңды өкілдерінің кәмелетке толмаған балалардың құқықтары мен мүдделерін қорғау, сондай-ақ олардың күтімі жөніндегі міндеттерін орындамағаны үшін ата-аналарына қатысты әкімшілік хаттамалар толтырып, материалдар сотқа жолданды,-деді облыстық полиция департаменті баспасөз қызметінде.
Заңды өкілдердің тәртібі кәмелетке толмағандардың істері және олардың құқықтарын қорғау жөніндегі қалалық комиссияда қаралып, олар ата-ана құқықтарынан 6 ай мерзімге шектеу туралы шешім қабылдады. Қазіргі уақытта Екібастұз қаласының қорғаншылық және қамқоршылық бөлімі материалдар дайындауда. Емдеу курсынан өткеннен кейін жас балалар мемлекеттік мекемелерге орналасады.
Фото: Облыстық ПД
