Павлодарда үйдің кіреберісі алдында ішімдік ішкендерге 22 мың теңгеден айыппұл салынды
Сәтбаев көшесіндегі көпқабатты үйдің тұрғындары дәл кіреберіс жанында сауық-сайран құрғандардың үстінен полицияға шағым түсірген. Оқиға орнына жеткен тәртіп сақшылары заң бұзушылардың әрекетін тоқтатты.
«Қызу күйде болған барлық азамат Павлодар қалалық уақытша бейімдеу және детоксикация орталығына жеткізілді. Олардың әрқайсысына 5 айлық есептік көрсеткіш (шамамен 22 мың теңге) көлемінде айыппұл салынады. Егер бір жыл ішінде осы әрекетті қайталаса, сот қаулысымен айыппұл көлемі екі есеге ұлғаяды немесе 5 тәулікке дейін әкімшілік қамау шарасы қолданылады», — деп хабарлады Павлодар облыстық полиция департаментінен.
Жалпы, жыл басынан бері Павлодар облысында қоғамдық орындарда спирттік ішімдік ішу және мас күйде жүруге қатысты 8 576 құқық бұзушылықтың жолы кесілген.
