Павлодарлық кальян сүйерге 1 миллион теңгеден астам айыппұл салынды
Демалыс күндері облыс аумағында өткен рейдтік іс-шаралар барысында полицейлер кальян қолдануға қатысты заң бұзушылықтардың 15 фактісін анықтады деп хабарлайды irbistv.kz тілшісі.
Тексеріс барысында Павлодар қаласының Ломов көшесінде орналасқан сауық мекемесінде келушіге темекі қоспасы бар кальян ұсынылғаны оны арнайы темекі жылытқышымен тұтату әрекеті жасалғаны анықталған. Сонымен қатар Екібастұз қаласындағы бірқатар мекемелерінде де келушілерге кальян қоспалары ұсынылғаны белгілі болды.
-Қазақстан Республикасының заңнамасында белгіленген орындарда темекі бұйымдарын, оның ішінде қыздырылатын темекі өнімдерін, кальянға арналған қоспаларды, электрондық тұтыну жүйелерін және оларға арналған сұйықтықтарды тұтынуға тыйым салу талаптарын бұзған тұлғалар жауапқа тартылған. Әрбір бұзушыға 15 айлық есептік көрсеткіш (АЕК) мөлшерінде айыппұл салынса, 8 ойын-сауық мекемесінің әкімшілері 20 АЕК көлемінде айыппұлмен әкімшілік жауапкершілікке тартылды,-деп жеткізді облыстық ПД баспасөз қызметінде.
Жыл басынан бері облыста қоғамдық орындарда темекі өнімдері мен электрондық темекіні заңсыз тұтынғаны үшін 33 құқық бұзушы жауапқа тартылғаны атап өтілді. “Учаске” жедел-профилактикалық іс-шарасы барысында полицейлер ойын-сауық мекемелері мен компьютерлік клубтарда құқық бұзушылықтардың алдын алу мақсатында жүйелі тексерістер өткізді. Нәтижесінде, бұл шаралар аясында 6 мыңға жуық адам әкімшілік жауапкершілікке тартылып, 203 ұсақ бұзақылық фактісі тіркелді. Алкогольді ішімдіктер ішіп, қоғамдық орындарда мас күйінде жүрген 618-ден астам азамат та жауапқа тартылды.
Фото: Облыстық ПД
