23 жасар Павлодарлық әлемнің ең үздік шахматшысын жеңді
Әлішер Сүлейменов Дохада өтіп жатқан "Qatar Masters Open" турнирінің екінші айналымында әлемнің ең үздік шахматшысы Магнус Карлсенді сенсациялық түрде жеңе білді.
Айту керек, FIDE әлемдік рейтингінде жерлесіміз Әлішер Сүлейменов 528-орында, ал оның қарсыласы Карлсен бірінші орында тұр. Нәтижелі кездесуден кейін павлодарлық зияткер өз ойымен бөлісті.
-Айтар сөзім жоқ. Жеңіске жеткеніме, әлі сенетін емеспін. Кездесу алдында, тым болмағанда, тең нәтижеге қол жеткізсем керемет деп ойладым. Бұны бапкерім де маған айтқан еді. Сондықтан не айтарымды білмей тұрмын, -деп жеткізді жас шахматшы.
Әлішер Сүлейменов Павлодарлық шахмат мектебінің түлегі. Өткен спорт маусымында Үндістанның Ченнай қаласында өткен Дүниежүзілік шахмат олимпиадасында Қазақстан құрамасының сапында өнер көрсеткен еді.
